Ikasturte berri honetan, Dantzaldi Ibiltariak, hainbat herritan aritu ostean, Victoria Eugenia Antzokian elkartuko ditu jauzi, soka-dantza, jota, porrua, balsa, mazurka, txotisa, pasodoblea, polka, kontradantza, kontrapasa dantza tradizionalen zale guztiak.
Aurten ere, Dantzaldi Ibiltariak bederatzi hiri eta herri bisitatuko ditu: Donostia, Bilbo, Galdakao, Sopela, Gernika, Durango, Iruñea, Azkain eta Markina.
AIKO taldeak, ikastaro egonkorren eta tailer, mintegi eta erromerien bitartez, dantzarako alternatiba erakargarria eskaini nahi du, izan ere, ekimena sortu zenetik 2.000 pertsona baino gehiago trebatu dira gure dantzetan. Hala, taldearen errepertorio aberatsa Campos Eliseos eta Victoria Eugenia antzokietako eszenatokietara eramango dira aurten ere, eta dantzari hasi berriei nahiz dantzan trebatu baina estiloa hobetu nahian dabiltzanei zuzendutako dantza tradizionalei buruzko ikastaro bana antolatuko dira bi agertoki horietan.
Beste aldetik eta honen harira, AIKO Taldeak ere, Iñaki Andres argazkilariaren Dantzazaleak erakusketa aurkeztu du. Irudiz irudi, AIKOk dantzari eta dantzazaleekin egiten duen lana islatzen du, ekimena 2009an abiatu zenetik taldearen ikastaro eta mintegietan parte hartu duten guztien omenez. Erakusketa Donostiako Udal Liburutegian dago ikusgai irailaren 30a arte.
Informazio guztia dantzari zoro hauen webgunean duzue.
