Dantzaz taldeak bere lan berriena, Harri, orri, Ar, taularatuko du larunbatean, Elorrioko Arriola Antzokian, 20:00etatik aurrera. Obra hori jolasaren aldeko aldarria da, ikuslearen irudimena pizteko pieza.
Arriola Antzokiaren webgunean jasotzen denez: “Nola sartu gastronomia eta dastamena dantzan? Nola esan den-dena isiltasun segundu batean? Nola kokatu gure gorputza eta bere mugimendua askoz zabalagoa den talde mugimendu batean? Dantzaz-ek ezagutzera gonbidatzen gaitu”.
Hamaika jatorritako dantzariz osaturiko askotariko taldea da Dantzaz; Nortasun berritzaile horren isla da, hain justu, Harri, orri, Ar. “Atrezzo jangarria, Mariachi musika, zirku-elementuak eta energia eta mugimenduaren fisikotasuna, guztiak dute lekua sormen honetan”.
Horrekin batera, beste bi pieza aurkeztuko ditu Dantzaz konpainiak: Historia de un segundo eta Complete surrender.
Informazio gehiago: arriolaka.eus.
