Musika, gastronomia, surfa eta natura ditu ardatz uztailaren 30ean, 31n eta abuztuaren 1ean estreinakoz egingo den Mundaka Festival jaialdiak. Emankor Sarea ekimenaren antolatzaileak aurkeztu du gaur jaialdia.
Jaialdiaren bitartez, kulturaren balioa azpimarratu nahi dute, Urdaibai eskualdeko garapen sozial eta ekonomikoan eragin baitezake, turismoarekin lotuz.
Hala, Mundakako Santa Katalina inguruan bi eszenatoki izango dira, eta horietan 80ko urteetako Echo & the Bunnymen ingelesak, 60ko urteetako The Sonics estatubatuarrak, eta Belako eta We are Standard euskaldunak izango dira, atzerriko eta Euskal Herriko taldeen partaidetza sustatu nahi baitute. Horiek dira orain arte iragarri dituzten lehenengo artisten izenak; laster, gehiago etorriko dira.
Santa Katalina inguru ederrean, gehienez 4.000 pertsona sartuko dira. “5.200 lagun sar zitezkeen, baina segurtasunari eta erosotasunari eman diegu lehentasuna, ez baitugu gurea ohiko jaialdi batean bihurtu nahi”, esan du Amets Rodriguez Emankorreko kideak. Horrekin batera, sarreren prezioa “popularra” dela azpimarratu du Rodriguezek, 55 euroan hiru egunak.
Halere, jaialdia Mundaka eta eskualde osora zabalduko da; beraz, 8.000 pertsona inguru espero dute. Esaterako, gastronomiari lotutako ekintzak kontzertuen eremutik at egingo dira; musika-esparru horretan ere jaki osasuntsuak eskuratu ahalko dira.
Informazio gehiago: mundakafestival.eus.
