Arizona Baby rock banda espainiarrak Elorrioko Arriola Antzokian joko du, gaur, 23:00etatik aurrera. Hirukoteak folk, rock eta psikodelia nahasten ditu, doinu akustikoen bidez. Espainiarrekin batera Mobydick musikari bizkaitarra izango da.
Javier Vielba (ahotsa, gitarra) Rubén Marrón (gitarra) eta Guille Aragón (bateria, perkusioak) musikariek osatzen dute taldea. Hirukoteak Secret Fires hirugarren laneko kantuak aurkeztuko ditu Elorrion.
Elementu gutxirekin eta formatu akustikoan, taldeak dozena bat doinu bildu ditu lan berrian, folk garaikideko lan akustiko bikaina ontzeko. Doors, Grateful Dead, Dylan, Beatles… klasikoen oihartzunak entzuten dira disko berrian, beti ere, Arizona Baby-ren galbahe garaikide eta akustikotik igarota.
Hedabide espezializatuen aburuz, espainiarrek orain arte argitaratu duten lan onena da hau.
